ಕಡಬ ಟೈಮ್ (KADABA TIMES) : ಪ್ರೀತಿಯಲ್ಲಿ ಬಿದ್ದ ಯುವಕ ಮತ್ತು ಯುವತಿ ರಿಜಿಸ್ಟರ್ಡ್ ಮದುವೆಯಾಗಿದ್ದು ಈ ವಿವಾಹಕ್ಕೆ ಯುವತಿಯ ಕುಟುಂಬಸ್ಥರು ತೀವ್ರ ಆಕ್ಷೇಪ ವ್ಯಕ್ತಪಡಿಸಿರುವುದಾಗಿ ತಿಳಿದು ಬಂದಿದೆ.
ಈ ಎಲ್ಲಾ ಬೆಳವಣಿಗೆಯ ನಡುವೆ ಯುವತಿ ಕಡೆಯವರು ಬೆಳ್ಳಾರೆ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ. ಕಡಬ ತಾಲೂಕಿನ ಎಣ್ಮೂರು ಗ್ರಾಮದ ಯುವಕ ಮತ್ತು ಯುವತಿ ಮಂಗಳವಾರ ರಿಜಿಸ್ಟರ್ಡ್ ಮದುವೆ ಮೂಲಕ ಒಂದಾಗಿದ್ದಾರೆ. ಈ ಜೋಡಿ ಮದುವೆಗಾಗಿ ಸುಳ್ಯದ ವಕೀಲರ ಕಚೇರಿಗೆ ಆಗಮಿಸಿದಾಗ, ಯುವತಿಯ ಮನೆಯವರಿಗೆ ಈ ವಿಷಯ ತಿಳಿದಿದೆ.
ತಕ್ಷಣವೇ ಸುಳ್ಯಕ್ಕೆ ಧಾವಿಸಿದ ಅವರು ಯುವಕ ಮತ್ತು ಯುವತಿಯನ್ನು ಪ್ರಶ್ನಿಸಲು ಯತ್ನಿಸಿದರು. ಆದರೆ, ಉಂಟಾದ ಗೊಂದಲದಿಂದ ಭಯಗೊಂಡ ಈ ಜೋಡಿ ಸುಳ್ಯ ಪೊಲೀಸ್ ಠಾಣೆಯ ಆಶ್ರಯ ಪಡೆದಿದ್ದಾರೆ.
ಪೊಲೀಸರು ಯುವಕ ಮತ್ತು ಯುವತಿಯನ್ನು ವಿಚಾರಿಸಿದ ಬಳಿಕ, ಹೆಚ್ಚಿನ ಕಾನೂನು ಕ್ರಮಕ್ಕಾಗಿ ಅವರನ್ನು ಪೊಲೀಸ್ ಸಿಬ್ಬಂದಿಯೊಂದಿಗೆ ಬೆಳ್ಳಾರೆ ಪೊಲೀಸ್ ಠಾಣೆಗೆ ಕಳುಹಿಸಿದ್ದಾರೆ. ಈ ಘಟನೆ ಸ್ಥಳೀಯವಾಗಿ ಚರ್ಚೆಗೆ ಕಾರಣವಾಗಿದ್ದು, ಮುಂದಿನ ಕಾನೂನು ಪ್ರಕ್ರಿಯೆಯನ್ನು ಎಲ್ಲರೂ ಎದುರು ನೋಡುತ್ತಿದ್ದಾರೆ.
