ಕಡಬ: ಕಡಬ ತಾಲೂಕಿನಲ್ಲಿ ಮರಳಿನ ಕೃತಕ ಅಭಾವವನ್ನು ಸೃಷ್ಟಿಸಿ, ಅವೈಜ್ಞಾನಿಕವಾಗಿ ಸಾರ್ವಜನಿಕರಿಂದ ಹಾಗೂ ಗುತ್ತಿಗೆದಾರರಿಂದ ಅತಿಯಾದ ಹೆಚ್ಚಿನ ದರ ವಸೂಲಿ ಮಾಡಲಾಗುತ್ತಿದೆ. ಈ ವ್ಯವಸ್ಥಿತ ದಂಧೆಯಿಂದಾಗಿ ಸ್ಥಳೀಯ ಸಣ್ಣ ಗುತ್ತಿಗೆದಾರರು ಹಾಗೂ ದಿನಗೂಲಿ ಕಾರ್ಮಿಕರು ತೀವ್ರ ಸಂಕಷ್ಟಕ್ಕೆ ಸಿಲುಕಿದ್ದಾರೆ ಎಂದು ಕಡಬ ತಾಲೂಕು ಗುತ್ತಿಗೆದಾರರ ಸಂಘದ ಪ್ರಮುಖರಾದ ಕ್ಸೇವಿಯರ್ ಬೇಬಿ ಅವರು ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಕಡಬದಲ್ಲಿ ಜಂಟಿ ಪತ್ರಿಕಾಗೋಷ್ಠಿ ನಡೆಸಿ ಮಾತನಾಡಿದ ಅವರು, ತಾಲೂಕಿನಾದ್ಯಂತ ಮರಳು ಸಿಗದೆ ಕರಾವಳಿಯ ನಿರ್ಮಾಣ ವಲಯ ಸಂಪೂರ್ಣ ಸ್ಥಗಿತಗೊಳ್ಳುವ ಭೀತಿ ಎದುರಾಗಿದೆ ಎಂದು ದೂರಿದರು.

1,500ಕ್ಕೂ ಅಧಿಕ ಕುಟುಂಬಗಳ ಜೀವನೋಪಾಯಕ್ಕೆ ಕುತ್ತು:

“ಕಡಬ ತಾಲೂಕಿನಲ್ಲಿ ಸರಿಸುಮಾರು 60 ರಿಂದ 70 ಮಂದಿ ಸಣ್ಣ ಗುತ್ತಿಗೆದಾರರಿದ್ದಾರೆ. ಇವರೆಲ್ಲರೂ ಪ್ರತಿದಿನ ಸರಾಸರಿ 15 ರಿಂದ 20 ಮಂದಿ ಕಾರ್ಮಿಕರಿಗೆ ಉದ್ಯೋಗ ನೀಡುತ್ತಾ ಬಂದಿದ್ದಾರೆ. ಈ ಮೂಲಕ ಸುಮಾರು 1,500ಕ್ಕೂ ಹೆಚ್ಚು ಕುಟುಂಬಗಳು ಜೀವನೋಪಾಯಕ್ಕಾಗಿ ಇವರ ಮೇಲೆಯೇ ನೇರವಾಗಿ ಅವಲಂಬಿತವಾಗಿವೆ. ಆದರೆ ಪ್ರಸ್ತುತ ನಡೆಯುತ್ತಿರುವ ಮರಳು ದಂಧೆಯಿಂದಾಗಿ ಸರ್ಕಾರಿ ಹಾಗೂ ಖಾಸಗಿ ಕಾಮಗಾರಿಗಳು ಅರ್ಧಕ್ಕೆ ನಿಲ್ಲುವ ಪರಿಸ್ಥಿತಿ ಬಂದಿದೆ. ಇದರಿಂದ ಕಾರ್ಮಿಕರಿಗೂ ಕೆಲಸವಿಲ್ಲದಂತಾಗಿ ತುತ್ತು ಅನ್ನಕ್ಕೂ ಪರದಾಡುವಂತಾಗಿದೆ” ಎಂದು ಕ್ಸೇವಿಯರ್ ಬೇಬಿ ಅಳಲು ತೋಡಿಕೊಂಡರು.

ಜಲ್ಲಿಗಿಂತ ಮರಳು ದುಬಾರಿ; ಇದು ಹಗಲು ದರೋಡೆ!

ಗುತ್ತಿಗೆದಾರರು ಮರಳಿನ ದರ ನೀತಿಯನ್ನು ಅಂಕಿ-ಅಂಶಗಳ ಸಹಿತ ಬಿಚ್ಚಿಟ್ಟಿದ್ದಾರೆ. ಸುಮಾರು 50 ರಿಂದ 60 ಕಿಲೋಮೀಟರ್ ದೂರದ ಕ್ವಾರಿಗಳಿಂದ ಕಲ್ಲು ತಂದು, ಬೌಲ್ಡರ್ ಮಾಡಿ, ಕ್ರಷರ್‌ಗಳಲ್ಲಿ ಭಾರಿ ಪ್ರಮಾಣದ ವಿದ್ಯುತ್ ಅಥವಾ ಜನರೇಟರ್ ಬಳಸಿ ಅಷ್ಟೊಂದು ಶ್ರಮವಹಿಸಿ ತಯಾರಿಸುವ ಒಂದು ಯೂನಿಟ್ ಜಲ್ಲಿ ಕಲ್ಲು ಕೇವಲ ₹4,000 ದಿಂದ ₹5,000 ಕ್ಕೆ ಸುಲಭವಾಗಿ ದೊರೆಯುತ್ತದೆ. ಆದರೆ ಕಡಬ ವ್ಯಾಪ್ತಿಯಲ್ಲೇ ಕೇವಲ 5 ರಿಂದ 6 ಕಿಲೋಮೀಟರ್ ಅಂತರದ ನದಿ ಮೂಲಗಳಲ್ಲಿ ಲಭ್ಯವಾಗುವ ಒಂದು ಯೂನಿಟ್ ಮರಳಿಗೆ ಬರೋಬ್ಬರಿ ₹8,000 ದಿಂದ ₹9,000 ವರೆಗೆ ವಸೂಲಿ ಮಾಡಲಾಗುತ್ತಿದೆ! ಇದು ಸಂಪೂರ್ಣ ಅವೈಜ್ಞಾನಿಕ ಹಾಗೂ ಸಾರ್ವಜನಿಕರ ಜೇಬಿಗೆ ಕತ್ತರಿ ಹಾಕುವ ಹಗಲು ದರೋಡೆಯಾಗಿದೆ ಎಂದು ಗುತ್ತಿಗೆದಾರರು ಆರೋಪಿಸಿದ್ದಾರೆ.

ಕಣ್ಣು ಮುಚ್ಚಿ ಕುಳಿತ ಇಲಾಖೆಗಳು – ಅಧಿಕಾರಿಗಳೇ ನೇರ ಹೊಣೆ:

ಸ್ಥಳೀಯ ಗುತ್ತಿಗೆದಾರರು ಅಧಿಕೃತವಾಗಿ ಮರಳು ಕೇಳಲು ಹೋದರೆ “ಮರಳು ಸ್ಟಾಕ್ ಇಲ್ಲ, ಲಭ್ಯವಿಲ್ಲ” ಎಂಬ ಸಿದ್ದ ಉತ್ತರ ಸಿಗುತ್ತದೆ. ಆದರೆ ಕಡಬ ವ್ಯಾಪ್ತಿಯಿಂದ ಪ್ರತಿನಿತ್ಯ 30 ರಿಂದ 40 ಬೃಹತ್ ಲೋಡ್ ಮರಳು ರಾಜಾರೋಷವಾಗಿ ಬೇರೆಡೆಗೆ ಸಾಗಾಟವಾಗುತ್ತಿರುವುದು ಕಣ್ಣಿಗೆ ಕಾಣಿಸುತ್ತಿದೆ. ಮರಳಿನ ಅಧಿಕೃತ ಟೆಂಡರ್ ಪಡೆದವರು ಸ್ಥಳೀಯರನ್ನು ವಂಚಿಸಿ ಯಾವ ಉದ್ದೇಶಕ್ಕಾಗಿ ಈ ತರಹದ ಕೃತಕ ಅಭಾವ ಸೃಷ್ಟಿಸುತ್ತಿದ್ದಾರೆ ಎಂಬುದು ದೊಡ್ಡ ಅನುಮಾನಕ್ಕೆ ಕಾರಣವಾಗಿದೆ. ಈ ಇಡೀ ಅಕ್ರಮಕ್ಕೆ ಸ್ಥಳೀಯ ಪೊಲೀಸ್ ಇಲಾಖೆ, ಕಂದಾಯ ಇಲಾಖೆ ಹಾಗೂ ಗಣಿ ಮತ್ತು ಭೂವಿಜ್ಞಾನ ಇಲಾಖೆಯ ಅಧಿಕಾರಿಗಳೇ ನೇರ ಹೊಣೆಗಾರರು. ಅಧಿಕಾರಿಗಳ ಮೂಗಿನ ನೇರಕ್ಕೆ ದಂಧೆಕೋರರು ಆಡುತ್ತಿದ್ದರೂ ಯಾವುದೇ ಕ್ರಮ ಜರುಗಿಸದಿರುವುದು ಇಲಾಖೆಗಳ ಶಾಮೀಲಾತಿಯನ್ನು ಎತ್ತಿ ತೋರಿಸುತ್ತದೆ ಎಂದು ಗುತ್ತಿಗೆದಾರರು ಕಟುವಾಗಿ ದೂರಿದ್ದಾರೆ.

ಸರ್ಕಾರದ ಮುಂದಿಟ್ಟ ಪ್ರಮುಖ ಬೇಡಿಕೆಗಳು:

• ದರ ನಿಯಂತ್ರಣ: ನೈಸರ್ಗಿಕವಾಗಿ ಸಿಗುವ ಮರಳಿನ ದರವು ಕೃತಕವಾಗಿ ತಯಾರಿಸುವ ಜಲ್ಲಿ ಕಲ್ಲಿಗಿಂತ ಸದಾ ಕಡಿಮೆಯಾಗಿರಬೇಕು.

  
  

• ಸರ್ಕಾರಿ ದರ ನಿಗದಿ: ಸರ್ಕಾರವೇ ಮಧ್ಯಪ್ರವೇಶಿಸಿ ಮರಳಿಗೆ ನಿರ್ದಿಷ್ಟ ನ್ಯಾಯುತ ದರವನ್ನು ನಿಗದಿಪಡಿಸಬೇಕು ಮತ್ತು ಅದೇ ದರದಲ್ಲಿ ಗ್ರಾಹಕರಿಗೆ ಸಿಗುವಂತೆ ನೋಡಿಕೊಳ್ಳಬೇಕು.

• ದರಪಟ್ಟಿ ಪ್ರದರ್ಶನ: ಮರಳು ಮಾರಾಟಗಾರರು ಕಡ್ಡಾಯವಾಗಿ ಸರ್ಕಾರದ ದರಪಟ್ಟಿಯನ್ನು (Price List) ಸಾರ್ವಜನಿಕರಿಗೆ ಕಾಣುವಂತೆ ಪ್ರದರ್ಶಿಸಬೇಕು.

• ವೇಬ್ರಿಡ್ಜ್ ಕಡ್ಡಾಯ: ಮರಳು ದಾಸ್ತಾನು ಕೇಂದ್ರಗಳಲ್ಲಿ (Sand Stockyards) ಕಡ್ಡಾಯವಾಗಿ ತೂಕದ ಮಾಪನ ಅಳವಡಿಸಬೇಕು ಹಾಗೂ ಪ್ರತಿಯೊಬ್ಬ ಗ್ರಾಹಕರಿಗೂ ತೂಕದ ಅಧಿಕೃತ ಪ್ರಮಾಣಪತ್ರ ನೀಡಬೇಕು.

ಉಗ್ರ ಹೋರಾಟದ ಎಚ್ಚರಿಕೆ:

ಮರಳಿನ ಟೆಂಡರ್ ಪಡೆದವರು ನಡೆಸುತ್ತಿರುವ ಈ ಸುಲಿಗೆಯನ್ನು ಸರ್ಕಾರ ಮತ್ತು ಜಿಲ್ಲಾಡಳಿತ ತಕ್ಷಣವೇ ಮಧ್ಯಪ್ರವೇಶಿಸಿ ನಿಲ್ಲಿಸಬೇಕು. ಸ್ಥಳೀಯ ಗುತ್ತಿಗೆದಾರರಿಗೆ ನ್ಯಾಯಯುತ ನಿಗದಿತ ದರದಲ್ಲಿ ಮರಳು ಸಿಗುವಂತೆ ಕ್ರಮ ಕೈಗೊಳ್ಳಬೇಕು. ಒಂದು ವೇಳೆ ಈ ಬೇಡಿಕೆಗಳಿಗೆ ಸಕಾರಾತ್ಮಕ ಸ್ಪಂದನೆ ಸಿಗದಿದ್ದರೆ, ಕಡಬ ತಾಲೂಕಿನ ಎಲ್ಲಾ ಗುತ್ತಿಗೆದಾರರು, ಕಟ್ಟಡ ನಿರ್ಮಾಣ ಪಾಲುದಾರರು ಹಾಗೂ ಕಾರ್ಮಿಕರು ಒಗ್ಗೂಡಿ ತಾಲೂಕು ಕಚೇರಿ ಮುಂಭಾಗ ಉಗ್ರ ಹೋರಾಟ ಮತ್ತು ತೀವ್ರ ಪ್ರತಿಭಟನೆ ನಡೆಸಬೇಕಾಗುತ್ತದೆ ಎಂದು ಪತ್ರಿಕಾಗೋಷ್ಠಿಯಲ್ಲಿ ಎಚ್ಚರಿಸಲಾಯಿತು.

ಪತ್ರಿಕಾಗೋಷ್ಠಿಯಲ್ಲಿ ಪ್ರಮುಖ ಗುತ್ತಿಗೆದಾರರಾದ ವಿನೋದ್ ಪಿ.ಎ., ಸತೀಶ್ ರೈ ಕರ್ಮೆಣ, ಮಹಮ್ಮದ್ ರಪೀಕ್, ಅಬೂಬಕ್ಕರ್ ಪಿ. ಹಾಗೂ ಬಾಲಚಂದ್ರ ಮೈಕಾಜೆ ಉಪಸ್ಥಿತರಿದ್ದರು.