ಕಡಬ / ಮಂಗಳೂರು: .ಐಐಟಿಗಳ ಪ್ರವೇಶಕ್ಕಾಗಿ ದೇಶಾದ್ಯಂತ ನಡೆದ ಕಠಿಣ ‘ಜೆಇಇ ಅಡ್ವಾನ್ಸ್ಡ್ 2026’ (JEE Advanced 2026) ಪರೀಕ್ಷೆಯ ಫಲಿತಾಂಶ ಹೊರಬಿದ್ದಿದ್ದು, ವಿಶ್ರುತ್ ಕೃಷ್ಣ ಅವರು ಆಲ್ ಇಂಡಿಯಾ ಮಟ್ಟದಲ್ಲಿ ಅತ್ಯದ್ಭುತ 79ನೇ ರ್ಯಾಂಕ್ ಗಳಿಸಿ ಕರಾವಳಿ ಜಿಲ್ಲೆಗಳಿಗೆ ಕೀರ್ತಿ ತಂದಿದ್ದಾರೆ.
ಇಷ್ಟೇ ಅಲ್ಲದೆ, ಇದಕ್ಕೂ ಮುನ್ನ ನಡೆದಿದ್ದ ‘ಜೆಇಇ ಮೇನ್ಸ್ 2026’ ಪರೀಕ್ಷೆಯಲ್ಲೂ ಆಲ್ ಇಂಡಿಯಾ ಮಟ್ಟದಲ್ಲಿ 335ನೇ ರ್ಯಾಂಕ್ ಬಾಚಿಕೊಳ್ಳುವ ಮೂಲಕ ತಮ್ಮ ವಿಶಿಷ್ಟ ಶೈಕ್ಷಣಿಕ ಸಾಮರ್ಥ್ಯವನ್ನು ಪ್ರದರ್ಶಿಸಿದ್ದರು. ಈ ಅತ್ಯುನ್ನತ ಸಾಧನೆಯೊಂದಿಗೆ ಬಿ. ವಿಶ್ರುತ್ ಕೃಷ್ಣ ಅವರು ದಕ್ಷಿಣ ಕನ್ನಡ ಹಾಗೂ ಉಡುಪಿ ಜಿಲ್ಲೆಗಳಿಗೆ ಒಟ್ಟಾರೆಯಾಗಿ ‘ಜಿಲ್ಲಾ ಟಾಪರ್’ ಆಗಿ ಹೊರಹೊಮ್ಮಿದ್ದಾರಲ್ಲದೆ, ಇಡೀ ಕರ್ನಾಟಕ ರಾಜ್ಯದ ಅಗ್ರ 10 (Top 10) ಅತ್ಯುತ್ತಮ ಸಾಧಕ ವಿದ್ಯಾರ್ಥಿಗಳಲ್ಲಿ ಒಬ್ಬರಾಗಿ ಹೆಮ್ಮೆಯ ಮುಕುಟ ಮುಡಿದಿದ್ದಾರೆ.
ಕಡಬದ ಹೆಸರಾಂತ ಹಿರಿಯ ವೈದ್ಯರ ಕುಟುಂಬದ ಕುಡಿ: ವಿಶ್ರುತ್ ಕೃಷ್ಣ ಅವರ ಈ ಐತಿಹಾಸಿಕ ಸಾಧನೆಯ ಹಿಂದೆ ವೈದ್ಯಕೀಯ ಹಾಗೂ ಶೈಕ್ಷಣಿಕ ಹಿನ್ನೆಲೆಯ ಪ್ರೇರಣೆಯಿದೆ. ಇವರು ಕಡಬದ ಪ್ರಸಿದ್ಧ ಹಾಗೂ ದಶಕಗಳ ಕಾಲ ಗ್ರಾಮೀಣ ಭಾಗದ ಜನರಿಗೆ ನಿಸ್ವಾರ್ಥ ವೈದ್ಯಕೀಯ ಸೇವೆ ನೀಡಿ ಮನೆಮಾತಾಗಿರುವ ಹಿರಿಯ ವೈದ್ಯ ಡಾ. ಸಿ.ಕೆ. ಶಾಸ್ತ್ರಿ ಅವರ ಪ್ರೀತಿಯ ಮೊಮ್ಮಗನಾಗಿದ್ದಾರೆ. ತಾತ ಕಡಬ ಪರಿಸರದಲ್ಲಿ ವೈದ್ಯಕೀಯ ಕ್ಷೇತ್ರದ ಮೂಲಕ ಸಮಾಜ ಸೇವೆ ಮಾಡಿ ಹೆಸರುವಾಸಿಯಾಗಿದ್ದರೆ, ಮೊಮ್ಮಗ ರಾಷ್ಟ್ರ ಮಟ್ಟದ ತಾಂತ್ರಿಕ ಶಿಕ್ಷಣ ಪ್ರವೇಶ ಪರೀಕ್ಷೆಯಲ್ಲಿ ಅತ್ಯುನ್ನತ ರ್ಯಾಂಕ್ ಗಳಿಸಿ ಕಡಬದ ಹೆಸರನ್ನು ದೇಶದ ನಕಾಶೆಯಲ್ಲಿ ಮಿನುಗುವಂತೆ ಮಾಡಿದ್ದಾರೆ.
ಪ್ರಸ್ತುತ ಮಂಗಳೂರಿನ ಬೆಂದೂರುವೆಲ್ ನಿವಾಸಿಯಾಗಿರುವ ವಿಶ್ರುತ್ ಅವರ ತಂದೆ ಬಡೆಕೈ ಡಾ. ರಾಮಚಂದ್ರ ಭಟ್ ಅವರು ಸುರತ್ಕಲ್‌ನ ಪ್ರತಿಷ್ಠಿತ ರಾಷ್ಟ್ರೀಯ ತಂತ್ರಜ್ಞಾನ ಸಂಸ್ಥೆಯಲ್ಲಿ (NITK) ಹಿರಿಯ ಪ್ರಾಧ್ಯಾಪಕರಾಗಿ ಸೇವೆ ಸಲ್ಲಿಸುತ್ತಿದ್ದಾರೆ. ತಾಯಿ ಡಾ. ಪೂರ್ಣಿಮಾ ಭಟ್ ಅವರು ಮಂಗಳೂರಿನ ಹೆಸರಾಂತ ಸ್ತ್ರೀರೋಗ ಹಾಗೂ ಪ್ರಸೂತಿ ತಜ್ಞೆಯಾಗಿದ್ದಾರೆ. ತಾತನ ಜನಸೇವೆ, ಹೆತ್ತವರ ಶೈಕ್ಷಣಿಕ ಶಿಸ್ತು ಮತ್ತು ಮಾರ್ಗದರ್ಶನವೇ ವಿಶ್ರುತ್ ಅವರ ಈ ಅಸಾಧಾರಣ ಯಶಸ್ಸಿನ ಹಿಂದಿನ ಪ್ರೇರಕ ಶಕ್ತಿಯಾಗಿದೆ.
ಗಣ್ಯರಿಂದ ಸಾಲು ಸಾಲು ಸನ್ಮಾನ : ರಾಜ್ಯ ಆರೋಗ್ಯ ಸಚಿವ ಯು.ಟಿ. ಖಾದರ್ , .ದಕ್ಷಿಣ ಕನ್ನಡ ಲೋಕಸಭಾ ಕ್ಷೇತ್ರದ ಸಂಸದ ಕ್ಯಾಪ್ಟನ್ ಬ್ರಿಜೇಶ್ ಚೌಟ , ಮಂಗಳೂರು ದಕ್ಷಿಣ ಕ್ಷೇತ್ರದ ಶಾಸಕ ವೇದವ್ಯಾಸ ಕಾಮತ್ ಅವರು ಸನ್ಮಾನಿಸಿ ಗೌರವಿಸಿ, ವಿಶ್ರುತ್ ಮುಂಬರುವ ದಿನಗಳಲ್ಲಿ ದೇಶದ ಪ್ರತಿಷ್ಠಿತ ಐಐಟಿಯಲ್ಲಿ ಶಿಕ್ಷಣ ಪಡೆದು ದೇಶದ ಅತ್ಯುನ್ನತ ತಂತ್ರಜ್ಞಾನ ಕ್ಷೇತ್ರಕ್ಕೆ ದೊಡ್ಡ ಕೊಡುಗೆ ನೀಡಲಿ ಎಂದು ಹಾರೈಸಿದ್ದಾರೆ.
