ಶ್ರೀ ಕ್ಷೇತ್ರ ಶರವೂರು ಮೊಗೇರ್ಕಳ ನೇಮೋತ್ಸವದಲ್ಲಿ ಕಂಡ ಅಪರೂಪದ ಅವಳಿ ಮಾವಿನ ಎಲೆ. ಮುದ್ದ-ಕಳಲರ ಸಂಕೇತವೆಂದೇ ನಂಬಿದ ಭಕ್ತರು. ನೇಮೋತ್ಸವದ ಸಂಪೂರ್ಣ ವರದಿ ಇಲ್ಲಿದೆ.
ಆಲಂಕಾರು : ತುಳುನಾಡಿನ ದೈವಾರಾಧನೆಯಲ್ಲಿ ನಂಬಿಕೆ ಮತ್ತು ಭಕ್ತಿಗೆ ಅಗ್ರಸ್ಥಾನ. ದೈವಗಳು ತನ್ನ ಅಸ್ತಿತ್ವವನ್ನು ಯಾವುದೋ ಒಂದು ರೂಪದಲ್ಲಿ ಭಕ್ತರಿಗೆ ತೋರಿಸಿಕೊಡುತ್ತವೆ ಎಂಬುದಕ್ಕೆ ಸಾಕ್ಷಿಯೊಂದು ಶರವೂರಿನಲ್ಲಿ ನಡೆದಿದೆ.
ಶ್ರೀ ಕ್ಷೇತ್ರ ಶರವೂರು ದುರ್ಗಾಪರಮೇಶ್ವರಿ ದೇವಸ್ಥಾನದ ಶ್ರೀ ಆದಿನಾಗಬ್ರಹ್ಮ ಮೊಗೇರ್ಕಳ ದೈವಸ್ಥಾನದಲ್ಲಿ ಮೇ 3 ಮತ್ತು 4 ರಂದು ನಡೆದ ನೇಮೋತ್ಸವದ ಸಂದರ್ಭದಲ್ಲಿ ಒಂದು ಅಪರೂಪದ ಘಟನೆ ನಡೆದಿದ್ದು, ಭಕ್ತರಲ್ಲಿ ಭಕ್ತಿಭಾವ ಉಕ್ಕಿ ಬರುವಂತೆ ಮಾಡಿದೆ.
ಅವಳಿ ಮಾವಿನ ಎಲೆಯ ಪವಾಡ: ದೈವಸ್ಥಾನದ ಅಲಂಕಾರ ಮಾಡುವ ಸಂದರ್ಭದಲ್ಲಿ ‘ಅವಳಿ ಮಾವಿನ ಎಲೆ’ ಪತ್ತೆಯಾಗಿದೆ. ಇದು ಕೇವಲ ಪ್ರಕೃತಿಯ ವಿಸ್ಮಯವಲ್ಲ, ಬದಲಿಗೆ ಅವಳಿ ವೀರರಾದ ಮುದ್ದ ಮತ್ತು ಕಳಲರೇ ಇಲ್ಲಿ ನೆಲೆಸಿದ್ದಾರೆ ಎನ್ನುವುದಕ್ಕೆ ಸಾಕ್ಷಿ ಎಂಬುದು ಭಕ್ತರ ದೃಢ ನಂಬಿಕೆ. ಈ ವಿಶೇಷ ಎಲೆಯು ನೇಮೋತ್ಸವದ ಸಂಭ್ರಮಕ್ಕೆ ಮತ್ತಷ್ಟು ದೈವಿಕ ಕಳೆಯನ್ನು ನೀಡಿತು.
ನೇಮೋತ್ಸವದ ಧಾರ್ಮಿಕ ವಿಧಿವಿಧಾನಗಳು: ಮೇ 3ರ ಆದಿತ್ಯವಾರ ಮಧ್ಯಾಹ್ನ ಶ್ರೀ ಮೊಗೇರ್ಕಳ ದೈವಗಳಿಗೆ ಭಕ್ತಿಯಿಂದ ‘ಮಂಜ ಸೇವೆ’ ಸಲ್ಲಿಸಲಾಯಿತು. ಸಂಜೆ ದೈವಗಳ ಭಂಡಾರವನ್ನು ಭವ್ಯವಾಗಿ ಹೊರತೆಗೆದು, ಬಿರ್ಮೆರೆ ಪೂಜೆ ನೆರವೇರಿಸಲಾಯಿತು. ರಾತ್ರಿ ಅನ್ನಪ್ರಸಾದ ವಿತರಣೆಯಾದ ಬಳಿಕ ನೇಮೋತ್ಸವ ನಡೆಯಿತು.
ಶ್ರೀ ಮೊಗೇರ್ಕಳ ದೈವಗಳು ಮತ್ತು ತನ್ನಿ ಮಾನಿಗ ದೈವ ಗರಡಿ ಇಳಿಯುವ ದೃಶ್ಯ ಭಕ್ತರ ಮೈನವಿರೇಳಿಸುವಂತಿತ್ತು. ದೈವ ಪಾತ್ರಿಗಳ ದರ್ಶನ, ಶ್ರೀ ಮೊಗೇರ ದೈವಗಳ ಗಂಧ ಬೂಳ್ಯ ವಿತರಣೆ ಹಾಗೂ ದೈವಗಳು ಹಾಲು ಕುಡಿಯಲು ಹೋಗುವ ವಿಶಿಷ್ಟ ಸಂಪ್ರದಾಯಗಳು ಶಾಸ್ತ್ರೋಕ್ತವಾಗಿ ನಡೆದವು.
ಕೊರಗ ತನಿಯ ದೈವದ ನೇಮ: ಮೇ 4ರಂದು ಪ್ರಾತಃಕಾಲದಲ್ಲಿ ಅತಿ ದೈವಿಕ ಶಕ್ತಿಯಾದ ಕೊರಗ ತನಿಯ ದೈವದ ನೇಮೋತ್ಸವ ಜರುಗಿತು. ಗ್ರಾಮೀಣ ಭಾಗದ ನೂರಾರು ಭಕ್ತರು ಈ ಭಕ್ತಿ ಪರವಶ ಕ್ಷಣಕ್ಕೆ ಸಾಕ್ಷಿಯಾದರು. ದೈವದ ಪ್ರಸಾದ ಪಡೆದು ಭಕ್ತರು ಪುನೀತರಾದರು. ಶರವೂರು ಕ್ಷೇತ್ರವು ಭಕ್ತಿ ಮತ್ತು ನಂಬಿಕೆಯ ಪವಿತ್ರ ಸಂಗಮವಾಗಿ ಮಾರ್ಪಟ್ಟಿತ್ತು.
