ಶ್ರೀ ಸಂಪುಟ ನರಸಿಂಹ ಸ್ವಾಮಿ ಸುಬ್ರಹ್ಮಣ್ಯ ಮಠದಲ್ಲಿ ನರಸಿಂಹ ಜಯಂತಿ ಪ್ರಯುಕ್ತ ಏಪ್ರಿಲ್ 27 ರಿಂದ ಮೇ 2 ರವರೆಗೆ ರಥೋತ್ಸವ, ವಿದ್ವತ್ ಗೋಷ್ಠಿ ಹಾಗೂ ಸಾಂಸ್ಕೃತಿಕ ಉತ್ಸವಗಳು ನಡೆಯಲಿವೆ. ಪೂರ್ಣ ವಿವರ ಇಲ್ಲಿದೆ

ಸುಬ್ರಹ್ಮಣ್ಯ: ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ಮಠದ ಶ್ರೀ ಸಂಪುಟ ನರಸಿಂಹ ಸ್ವಾಮಿ ಸನ್ನಿಧಿಯಲ್ಲಿ ಈ ವರ್ಷದ ‘ನರಸಿಂಹ ಜಯಂತಿ’ ಕಾರ್ಯಕ್ರಮಗಳು ಏಪ್ರಿಲ್ 27 ರಿಂದ ಮೇ 2 ರವರೆಗೆ ಅತ್ಯಂತ ವೈಭವದಿಂದ ಜರುಗಲಿವೆ. ಮಠದ ಶ್ರೀ ವಿದ್ಯಾಪ್ರಸನ್ನ ತೀರ್ಥ ಶ್ರೀಪಾದರ ಮಾರ್ಗದರ್ಶನದಲ್ಲಿ ವಿವಿಧ ಧಾರ್ಮಿಕ ವಿಧಿವಿಧಾನಗಳು ಹಾಗೂ ಸಾಂಸ್ಕೃತಿಕ ಕಾರ್ಯಕ್ರಮಗಳು ಆಯೋಜನೆಗೊಂಡಿವೆ.

ಧಾರ್ಮಿಕ ಕಾರ್ಯಕ್ರಮಗಳ ವಿವರ:

• ಏಪ್ರಿಲ್ 28: ಗಣಹೋಮ, ಶ್ರೀ ನರಸಿಂಹ ಹೋಮ, ಶ್ರೀ ವೇದವ್ಯಾಸ ಜಯಂತಿ ಹಾಗೂ ವಸಂತ ಪೂಜೆ ನಡೆಯಲಿದೆ.

• ಏಪ್ರಿಲ್ 30 (ನರಸಿಂಹ ಜಯಂತಿ): ಪ್ರಾತಃಕಾಲ ಶ್ರೀ ನರಸಿಂಹ ದೇವರಿಗೆ ಮಹಾಭಿಷೇಕ, ರಾತ್ರಿ ಹೊರಾಂಗಣ ಮತ್ತು ರಾಜಬೀದಿಯಲ್ಲಿ ವೈಭವದ ವಿಮಾನೋತ್ಸವ, ವಸಂತ ಪೂಜೆ ಹಾಗೂ ಡೋಲೋತ್ಸವ ಜರುಗಲಿದೆ.

• ಮೇ 1 (ವ್ಯಾಸ ಪೂರ್ಣಿಮಾ): ಪೂರ್ವಾಹ್ನ ವ್ಯಾಸ ಪೂಜೆ ಹಾಗೂ ಸಂಜೆ ಅದ್ಧೂರಿ ಮಹಾರಥೋತ್ಸವ ನಡೆಯಲಿದೆ.

• ಮೇ 2: ಪವಿತ್ರ ಕುಮಾರಧಾರಾ ನದಿಯಲ್ಲಿ ಅವಭೃತೋತ್ಸವ (ಆರಟು) ನಡೆಯುವುದರೊಂದಿಗೆ ಉತ್ಸವ ಸಂಪನ್ನಗೊಳ್ಳಲಿದೆ.

ಸಾಂಸ್ಕೃತಿಕ ಮತ್ತು ವಿದ್ವತ್ ಪ್ರಭೆ:

ವೇದವ್ಯಾಸ ಸಂಶೋಧನ ಕೇಂದ್ರದ ಸಹಭಾಗಿತ್ವದಲ್ಲಿ ಮಠದ ಶ್ರೀ ಅನಿರುದ್ಧತೀರ್ಥ ವೇದಿಕೆಯಲ್ಲಿ ಪ್ರತಿದಿನ ಸಂಜೆ ಸಾಂಸ್ಕೃತಿಕ ಕಾರ್ಯಕ್ರಮಗಳು ನಡೆಯಲಿವೆ.

• ಉದ್ಘಾಟನೆ: ಏಪ್ರಿಲ್ 28ರಂದು ಸಂಜೆ ಎಡನೀರು ಮಠದ ಶ್ರೀ ಸಚ್ಚಿದಾನಂದ ಭಾರತೀ ಶ್ರೀಪಾದರು ಸಾಂಸ್ಕೃತಿಕ ಕಾರ್ಯಕ್ರಮಗಳನ್ನು ಉದ್ಘಾಟಿಸಲಿದ್ದಾರೆ. ಬಳಿಕ ಚೆನ್ನೈನ ವಿದ್ವಾನ್ ಕುನ್ನಕುಡಿ ಬಾಲಮುರಳಿಕೃಷ್ಣ ಅವರಿಂದ ಕರ್ನಾಟಕ ಶಾಸ್ತ್ರೀಯ ಸಂಗೀತ ಕಛೇರಿ ನಡೆಯಲಿದೆ.

  • ಏಪ್ರಿಲ್ 29: ಧೀರಜ್ ರೈ ಸಂಪಾಜೆ ಅವರಿಂದ ‘ಯಕ್ಷ-ಗಾನ-ಹಾಸ್ಯ ವೈಭವ’ ಹಾಗೂ ವಿದುಷಿ ವಿದ್ಯಾಶ್ರೀ ರಾಧಾಕೃಷ್ಣ ತಂಡದಿಂದ ಭರತನಾಟ್ಯ.

  • ಏಪ್ರಿಲ್ 30: ಉಡುಪಿ ಪೇಜಾವರ ಮಠದ ಶ್ರೀ ವಿಶ್ವಪ್ರಸನ್ನ ತೀರ್ಥ ಶ್ರೀಪಾದರು ಹಾಗೂ ಸುಬ್ರಹ್ಮಣ್ಯ ಮಠದ ಶ್ರೀ ವಿದ್ಯಾಪ್ರಸನ್ನ ತೀರ್ಥ ಶ್ರೀಪಾದರಿಂದ ‘ಅನುಗ್ರಹ ಸಂದೇಶ’. ವಿದ್ವಾನ್ ವಾಗೀಶಾಚಾರ್ಯ ಗೊರೆಬಾಳ ಅವರಿಂದ ‘ನರಸಿಂಹ ಅವತಾರದ ಔಚಿತ್ಯ’ ಉಪನ್ಯಾಸ. ಸಂಜೆ ಪುತ್ತೂರು ಗಣೇಶ್ ಅವರಿಂದ ಸ್ಯಾಕ್ರೋಫೋನ್ ಕಛೇರಿ.

  • ಮೇ 1: ಬೆಂಗಳೂರಿನ ವಿದ್ವಾನ್ ರಾಜಕಮಲ್ ತಂಡದಿಂದ ಕೊಳಲುವಾದನ ಹಾಗೂ ಉಡುಪಿಯ ಲಕ್ಷ್ಮೀ ಗುರುರಾಜ್ ತಂಡದಿಂದ ‘ನೃತ್ಯ ನೀರಾಜನಂ’.

  • ಮೇ 2: ಕಟೀಲು ಶ್ರೀ ದುರ್ಗಾಪರಮೇಶ್ವರೀ ದಶಾವತಾರ ಯಕ್ಷಗಾನ ಮಂಡಳಿಯಿಂದ ‘ತ್ರಿಜನ್ಮ ಮೋಕ್ಷ’ ಯಕ್ಷಗಾನ ಬಯಲಾಟ ನಡೆಯಲಿದೆ.

ಏಪ್ರಿಲ್ 27 ರಿಂದ ಪ್ರತಿದಿನ ಬೆಳಿಗ್ಗೆ 6.30 ರಿಂದ ಸಂಜೆ 6.30 ರವರೆಗೆ ನಿರಂತರ ‘ಏಕಾದಶಿ ನಾಮ ಸಂಕೀರ್ತನೆ’ ಮತ್ತು ಭಜನಾ ಕಾರ್ಯಕ್ರಮಗಳು ನಡೆಯಲಿದ್ದು, ಭಕ್ತಾದಿಗಳು ಹೆಚ್ಚಿನ ಸಂಖ್ಯೆಯಲ್ಲಿ ಪಾಲ್ಗೊಳ್ಳುವಂತೆ ಮಠದ ಪ್ರಕಟಣೆ ತಿಳಿಸಿದೆ.