ಕಡಬ: ಇಲ್ಲಿನ ಧರ್ಮಸ್ಥಳ-ಸುಬ್ರಹ್ಮಣ್ಯ ರಾಜ್ಯ ಹೆದ್ದಾರಿಯ ಇಚಿಲಂಪಾಡಿಯಲ್ಲಿ ಮುರಿದು ಬಿದ್ದ ಮರ ರಸ್ತೆ ಬದಿಯಲ್ಲೇ ಇದ್ದು ಅಪಘಾತಕ್ಕೆ ಆಹ್ವಾನ ನೀಡುವಂತಿದೆ.
ಪೆರಿಯಶಾಂತಿ- ಇಚಿಲಂಪಾಡಿ ನಡುವಿನ ಕಾಯರ್ತಡ್ಕ ಬಳಿ ಈ ಮರದ ಗೆಲ್ಲುಗಳು ರಸ್ತೆಯನ್ನೇ ಆಕ್ರಮಿಸಿದೆ. ಈಗಾಗಲೇ ಷಷ್ಠಿ ಹಿನ್ನೆಲೆಯಲ್ಲಿ ಈ ರಸ್ತೆಯಲ್ಲಿ ರಾತ್ರಿ-ಹಗಲು ವಾಹನಗಳ ಓಡಾಟ ಹೆಚ್ಚಾಗಿದೆ.
ರಸ್ತೆಯ ಇನ್ನೊಂದು ಕಡೆ ಮರದ ಬುಡವಿದ್ದು ಈ ಕಡೆ ಅದನ್ನು ಎಳೆದು ಹಾಕಿದಂತಿದೆ. ವಾಹನ ಸವಾರರೇ ಸಂಚಾರಕ್ಕಾಗಿ ಮಾಡಿರಬಹುದೆಂದು ಹೇಳಲಾಗಿದೆ. ಮುರಿದು ಬಿದ್ದಿದ್ದರೂ ತೆರವು ಮಾಡದಿರುವುದು ಅರಣ್ಯ ಇಲಾಖೆಯ ನಿರ್ಲಕ್ಷ್ಯಕ್ಕೆ ಇದೊಂದು ಉದಾಹರಣೆ ಎಂದು ವಾಹನ ಸವಾರರು, ಸಾರ್ವಜನಿಕರು ಆಕ್ರೋಶ ಹೊರಹಾಕಿದ್ದು ಕೂಡಲೇ ತೆರವುಗೊಳಿಸುವಂತೆ ಆಗ್ರಹಿಸಿದ್ದಾರೆ.
