​ಕುಕ್ಕೆ ಸುಬ್ರಹ್ಮಣ್ಯ / ಕಡಬ:ಸ್ಥಳೀಯ ಗ್ರಾಮ ಪಂಚಾಯತ್‌ನ ಬೇಜವಾಬ್ದಾರಿತನ ಹಾಗೂ ನಿರ್ಲಕ್ಷ್ಯಕ್ಕೆ ಅಮಾಯಕ ಕುಟುಂಬವೊಂದು ಜೀವಭಯದಲ್ಲಿ ದಿನ ಕಳೆಯುವಂತಾಗಿದೆ.

ಸುಬ್ರಹ್ಮಣ್ಯ ಗ್ರಾಮ ಪಂಚಾಯತ್ ವ್ಯಾಪ್ತಿಯ ದೇವರಗದ್ದೆ ಎಂಬಲ್ಲಿ ಪರಿಶಿಷ್ಟ ಸಮುದಾಯಕ್ಕೆ ಸೇರಿದ ಬಾಬು ಎಂಬವರ ಮನೆಯ ತೀರಾ ಗೋಡೆಯ ಪಕ್ಕದಲ್ಲೇ ಚರಂಡಿ ನಿರ್ಮಾಣಕ್ಕಾಗಿ ದೊಡ್ಡ ಹೊಂಡ ತೆಗೆದು ತಿಂಗಳಾಗುತ್ತಾ ಬಂದರೂ  ಇದುವರೆಗೆ ಕಾಮಗಾರಿ ಪೂರ್ಣಗೊಳಿಸದೆ ಹಾಗೇ ಬಿಡಲಾಗಿದೆ.

​ಪ್ರಸ್ತುತ ಸುರಿಯುತ್ತಿರುವ ಮಳೆಯಿಂದಾಗಿ ಹೊಂಡದಲ್ಲಿ ನೀರು ತುಂಬಿಕೊಳ್ಳುತ್ತಿದ್ದು, ಯಾವುದೇ ಕ್ಷಣದಲ್ಲೂ ಮನೆಯ ಗೋಡೆ ಕುಸಿದು ಬೀಳುವ  ಅಪಾಯ ಎದುರಾಗಿದೆ.
​

ಅಧಿಕಾರಿಗಳ ನಿರ್ಲಕ್ಷ್ಯ:ಸುಬ್ರಹ್ಮಣ್ಯ ದೇವರಗದ್ದೆಯ ಬಾಬು ಅವರ ಮನೆಯ ಗೋಡೆಯ ಬುಡದಲ್ಲೇ ಚರಂಡಿ ಹೊಂಡವನ್ನು ಯಂತ್ರಗಳ ಮೂಲಕ ಅಗೆಯಲಾಗಿತ್ತು. ಆದರೆ, ಹೊಂಡ ತೆಗೆದ ಗುತ್ತಿಗೆದಾರರಾಗಲಿ ಅಥವಾ ಸಂಬಂಧಪಟ್ಟ ಪಂಚಾಯತ್ ಆಡಳಿತವಾಗಲಿ  ಯಾವುದೇ ಕಾಮಗಾರಿ ಮುಂದುವರಿಸದೆ ನಿರ್ಲಕ್ಷ್ಯ ವಹಿಸಿದೆ.

​ಮಳೆಯ ನೀರು ನಿರಂತರವಾಗಿ ಹೊಂಡಕ್ಕೆ ಹರಿಯುತ್ತಿರುವುದರಿಂದ ಮನೆಯ ತಳಪಾಯ ಹಾಗೂ ಗೋಡೆ ಶಿಥಿಲಗೊಳ್ಳುತ್ತಿದ್ದು, ಕುಟುಂಬಸ್ಥರು ರಾತ್ರೋರಾತ್ರಿ ಜೀವಭಯದಲ್ಲೇ ಕಾಲ ಕಳೆಯುವಂತಾಗಿದೆ. ಈ ಕುರಿತು ಪಂಚಾಯತ್ ಅಧಿಕಾರಿಗಳನ್ನು ಸಂಪರ್ಕಿಸಲು ಪ್ರಯತ್ನಿಸಿದರೆ ಮೊಬೈಲ್ ಫೋನ್‌ಗಳನ್ನು ಸ್ವಿಚ್ ಆಫ್ ಮಾಡಿಕೊಂಡು ಸ್ಪಂದಿಸುತ್ತಿಲ್ಲ ಎಂದು ಕುಟುಂಬಸ್ಥರು ಅಳಲು ತೋಡಿಕೊಂಡಿದ್ದಾರೆ.

​ಮೇಲಧಿಕಾರಿಗಳಿಗೆ ದೂರು ನೀಡಿದ ಬೆನ್ನಲ್ಲೇ ಓಡೋಡಿ ಬಂದ ಪಂಚಾಯತ್ ಸಿಬ್ಬಂದಿ: ಪಂಚಾಯತ್ ಆಡಳಿತದ ಧೋರಣೆಯಿಂದ ಬೇಸತ್ತ ಕುಟುಂಬಸ್ಥರು  ಕಡಬ ತಾಲೂಕು ಪಂಚಾಯತ್, ದಕ್ಷಿಣ ಕನ್ನಡ ಜಿಲ್ಲಾ ಪಂಚಾಯತ್ ಹಾಗೂ ಜಿಲ್ಲಾಧಿಕಾರಿಗಳ ಕಚೇರಿಗೆ ಮೌಖಿಕ ದೂರು ಸಲ್ಲಿಸಿದ್ದಾರೆ.

ತಕ್ಷಣವೇ ಎಚ್ಚೆತ್ತ ಪಂಚಾಯತ್ ಸಿಬ್ಬಂದಿ, ತರಾತುರಿಯಲ್ಲಿ ಸಂಜೆಯ ಹೊತ್ತಿಗೆ ಸ್ಥಳಕ್ಕೆ ಎರಡು ಸಿಮೆಂಟ್ ಮೋರಿ ಪೈಪ್‌ಗಳನ್ನು ತಂದು ಇಳಿಸಿದ್ದಾರೆ. ಆದಾಗ್ಯೂ, ಚರಂಡಿ ಸಂಪೂರ್ಣವಾಗಲು ಇನ್ನೂ ಒಂದು ಪೈಪ್ ಅಳವಡಿಸಬೇಕಾಗಿದ್ದು, ಮಣ್ಣು ಮುಚ್ಚುವ ಕಾಮಗಾರಿ ಬಾಕಿ ಉಳಿದಿದೆ. ಅಕ್ಟೋಬರ್ 2 ರಂದು (2/10/2026) ಬಾಕಿ ಉಳಿದಿರುವ ಸಂಪೂರ್ಣ ಕಾಮಗಾರಿಯನ್ನು ಪೂರ್ಣಗೊಳಿಸಿಕೊಡುವುದಾಗಿ ಅಧಿಕಾರಿಗಳು ಭರವಸೆ ನೀಡಿದ್ದಾರೆ.

​ಅನಾಹುತ ಸಂಭವಿಸಿದರೆ ಪಂಚಾಯತ್ ನೇರ ಹೊಣೆ:
“ನಾವು ಬಡವರು, ಪರಿಶಿಷ್ಟ ಸಮುದಾಯದವರು ಎಂಬ ಕಾರಣಕ್ಕೆ ಪಂಚಾಯತ್ ನಮ್ಮ ಸಮಸ್ಯೆಯನ್ನು ನಿರ್ಲಕ್ಷಿಸುತ್ತಿದೆ. ಮನೆಯ ಗೋಡೆ ಪಕ್ಕದಲ್ಲೇ 29 ದಿನಗಳಿಂದ ಹೊಂಡ ತೆಗೆದಿಟ್ಟು ಸತಾಯಿಸುತ್ತಿದ್ದಾರೆ. ಇಂದಿನ ಮಳೆಗೆ ಗೋಡೆ ಕುಸಿದು ಬಿದ್ದು ನಮ್ಮ ಕುಟುಂಬಕ್ಕೆ ಏನಾದರೂ ಜೀವಹಾನಿ ಅಥವಾ ಆಸ್ತಿಪಾಸ್ತಿ ನಷ್ಟ ಸಂಭವಿಸಿದರೆ ಅದಕ್ಕೆ ಸುಬ್ರಹ್ಮಣ್ಯ ಗ್ರಾಮ ಪಂಚಾಯತ್ ಆಡಳಿತವೇ ನೇರ ಹೊಣೆಯಾಗಲಿದೆ” ಎಂದು ಮನೆಯವರು ಎಚ್ಚರಿಕೆ ನೀಡಿದ್ದಾರೆ. ಬಾಕಿ ಉಳಿದಿರುವ ಕಾಮಗಾರಿಯನ್ನು ತಕ್ಷಣವೇ ಪೂರ್ಣಗೊಳಿಸಿ ಅಪಾಯ ಮುಕ್ತಗೊಳಿಸಬೇಕೆಂದು  ಆಗ್ರಹಿಸಲಾಗಿದೆ.