ಕಡಬ:ಕಡಬ ಪೊಲೀಸ್ ಠಾಣಾ ವ್ಯಾಪ್ತಿಯ ಹಳೆನೆರೆಂಕಿ ಗ್ರಾಮದ ನಿರ್ಜನ ಗುಡ್ಡ ಪ್ರದೇಶದಲ್ಲಿ ಹಣವನ್ನು ಪಣವಾಗಿಟ್ಟು ಅಕ್ರಮವಾಗಿ ‘ಉಳಾಯಿ-ಪಿದಾಯಿ’ (ಅಂದರ್-ಬಾಹರ್) ಇಸ್ಪೀಟ್ ಆಟವಾಡುತ್ತಿದ್ದ ಜುಗಾರಿ ಅಡ್ಡೆಯ ಮೇಲೆ ಕಡಬ ಪೊಲೀಸರು ದಿಢೀರ್ ದಾಳಿ ನಡೆಸಿ ಓರ್ವನನ್ನು ವಶಕ್ಕೆ ಪಡೆದುಕೊಂಡಿದ್ದಾರೆ.
ಹಳೆನೆರೆಂಕಿ ಗ್ರಾಮದ ಶಾಂತ್ಯ ಮನೆ ನಿವಾಸಿ ಕೇಶವ (52) ಪೊಲೀಸರ ಬಲೆಗೆ ಬಿದ್ದ ಆರೋಪಿ.
ಸೆ.1ರ ಸಂಜೆ ಕಡಬ ಪೊಲೀಸ್ ಉಪನಿರೀಕ್ಷಕ (PSI) ಜಂಬುರಾಜ್ ಮಹಾಜನ್ ಹಾಗೂ ಸಿಬ್ಬಂದಿ ಹೊಸಮಠ ಭಾಗದಲ್ಲಿ ಕರ್ತವ್ಯದಲ್ಲಿದ್ದಾಗ, ಹಳೆನೆರೆಂಕಿ ಗ್ರಾಮದ ಒಡೈಮೆ ಸಮೀಪದ ಕೆಸಿಡಿಸಿ (KCDC) ಸರ್ಕಾರಿ ಗುಡ್ಡದಲ್ಲಿ ಸಂಶಯಾಸ್ಪದ ವ್ಯಕ್ತಿಗಳು ಗುಂಪು ಸೇರಿರುವ ಬಗ್ಗೆ ಮಾಹಿತಿ ಲಭಿಸಿತ್ತು.
ಮಾಹಿತಿ ಮೇರೆಗೆ ಪೊಲೀಸ್ ತಂಡವು ರಾತ್ರಿ ಒಡೈಮೆ ಎಸ್ಟೇಟ್ ಬಳಿ ಜೀಪ್ ನಿಲ್ಲಿಸಿ, ಕಾಲ್ನಡಿಗೆಯಲ್ಲಿ ಸುಮಾರು 300 ಅಡಿ ಗುಡ್ಡದ ಕಡೆಗೆ ತೆರಳಿದೆ. ಈ ವೇಳೆ ಗುಡ್ಡದ ಮೇಲಿಂದ “ನಂದೂ ನೂರು, ನಂದು ನೂರು, ಉಳಾಯಿ-ಪಿದಾಯಿ” ಎಂದು ಜುಗಾರಿ ಆಡುತ್ತಿದ್ದ ಶಬ್ದ ಕೇಳಿಬಂದಿದೆ. ಸಮವಸ್ತ್ರದಲ್ಲಿದ್ದ ಪೊಲೀಸರು ಗುಡ್ಡವೇರಿ ಸ್ಥಳಕ್ಕೆ ಧಾವಿಸುತ್ತಿದ್ದಂತೆ, “ಪೊಲೀಸರು ಬಂದರು, ನವೀನ್, ನಾಣ್ಯಪ್ಪ, ಶೋಭಿತ್, ಅರುಣ, ಕೇಶವ ಓಡು ಓಡು” ಎಂದು ಕೂಗಿಕೊಂಡು ಆರೋಪಿಗಳು ಕಾಡಿನತ್ತ ಓಡಿದ್ದಾರೆ.
ಈ ಸಂದರ್ಭದಲ್ಲಿ ಓಡಲು ಸಾಧ್ಯವಾಗದೆ ಸ್ಥಳದಲ್ಲೇ ಕುಳಿತಿದ್ದ ಕೇಶವ ಎಂಬಾತನನ್ನು ಪೊಲೀಸರು ಸುತ್ತುವರಿದು ವಶಕ್ಕೆ ಪಡೆದಿದ್ದು, ಉಳಿದ ನಾಲ್ವರು ಕತ್ತಲಲ್ಲಿ ಕಾಡು ಹಾದಿಯ ಮೂಲಕ ಪರಾರಿಯಾಗಿದ್ದಾರೆ.
ಪ್ರಕರಣದಲ್ಲಿ ಭಾಗಿಯಾದ ಆರೋಪಿಗಳ ವಿವರ:
| ಆರೋಪಿ ಸಂಖ್ಯೆ | ಹೆಸರು ಹಾಗೂ ವಿಳಾಸ | ಸ್ಥಿತಿಗತಿ |
| A1 |
ಕೇಶವ (52), ತಂದೆ: ಬಾಬು ಪೂಜಾರಿ, ಶಾಂತ್ಯ ಮನೆ, ಹಳೆನೆರೆಂಕಿ |
ಸ್ಥಳದಲ್ಲೇ ಬಂಧಿತ |
| A2 |
ನವೀನ್, ಹಳೆನೆರೆಂಕಿ ಗ್ರಾಮ |
ತಲೆಮರೆಸಿಕೊಂಡಿದ್ದಾನೆ   |
| A3 |
ನಾಣ್ಯಪ್ಪ, ಹಳೆನೆರೆಂಕಿ ಗ್ರಾಮ |
ತಲೆಮರೆಸಿಕೊಂಡಿದ್ದಾನೆ |
| A4 |
ಶೋಭಿತ್, ಹಳೆನೆರೆಂಕಿ ಗ್ರಾಮ |
ತಲೆಮರೆಸಿಕೊಂಡಿದ್ದಾನೆ |
| A5 |
ಅರುಣ್, ಹಳೆನೆರೆಂಕಿ ಗ್ರಾಮ |
ತಲೆಮರೆಸಿಕೊಂಡಿದ್ದಾನೆ |
ಜಪ್ತಿಯಾದ ಸ್ವತ್ತುಗಳ ವಿವರ: ಜುಗಾರಿಗೆ ಪಣವಾಗಿಟ್ಟಿದ್ದ ₹1,020/- ನಗದು ಹಣ (₹500 ಮುಖಬೆಲೆಯ 1, ₹100 ಮುಖಬೆಲೆಯ 1, ₹50 ಮುಖಬೆಲೆಯ 2, ₹20 ಮುಖಬೆಲೆಯ 5 ಹಾಗೂ ₹10 ಮುಖಬೆಲೆಯ 2 ನೋಟುಗಳು), 52 ಇಸ್ಪೀಟ್ ಆಟದ ಕಾರ್ಡ್‌ಗಳು ಹಾಗೂ 1 ಪ್ಲಾಸ್ಟಿಕ್ ಚೀಲ, ಸ್ಥಳದಲ್ಲಿ ಬಿದ್ದಿದ್ದ 2 ನೋಕಿಯಾ (Nokia) ಕೀ-ಪ್ಯಾಡ್ ಮೊಬೈಲ್ ಫೋನ್‌ಗಳು (ಅಂದಾಜು ಮೌಲ್ಯ ₹800,)ಪಂಚರ ಸಮಕ್ಷಮ ಅಂದರ್-ಬಾಹರ್ ಆಡುತ್ತಿದ್ದ ಪ್ಲಾಸ್ಟಿಕ್ ಚೀಲದ ಮೇಲಿದ್ದ ಸೊತ್ತುಗಳನ್ನು ಪೊಲೀಸರು ವಶಪಡಿಸಿಕೊಂಡಿದ್ದಾರೆ.
ಕಡಬ ಠಾಣೆಯಲ್ಲಿ ಕೇಸ್ ದಾಖಲು: ಈ ಅಕ್ರಮ ಜುಗಾರಿ ಕೃತ್ಯಕ್ಕೆ ಸಂಬಂಧಿಸಿ ಕಡಬ ಪೊಲೀಸ್ ಠಾಣೆಯಲ್ಲಿಅಪರಾಧ ಸಂಖ್ಯೆ: 104/2026 ಕಲಂಗಳು: 87 ಕರ್ನಾಟಕ ಪೊಲೀಸ್ ಕಾಯ್ದೆ (KP Act) ಹಾಗೂ ಕಲಂ 112 ಭಾರತೀಯ ನ್ಯಾಯ ಸಂಹಿತೆ (BNS 2023) ಅಡಿಯಲ್ಲಿ ಸ್ವಯಂಪ್ರೇರಿತ (Suo Moto) ಪ್ರಕರಣ ದಾಖಲಾಗಿದ್ದು, ಪರಾರಿಯಾಗಿರುವ ನವೀನ್, ನಾಣ್ಯಪ್ಪ, ಶೋಭಿತ್ ಮತ್ತು ಅರುಣ್ ಪತ್ತೆಗಾಗಿ ಪೊಲೀಸರು ಶೋಧ ನಡೆಸುತ್ತಿದ್ದಾರೆ.
