ನೆಟ್ಟಣದ ಬಾರ್ ಒಂದರಲ್ಲಿ ಕಳೆದ 7 ವರ್ಷಗಳಿಂದ ಕೆಲಸಕ್ಕಿದ್ದ ಹರ್ಷಿತ್ ಎಂಬಾತ ಸುಮಾರು 6.57 ಲಕ್ಷ ರೂ. ಮೌಲ್ಯದ ಮದ್ಯದ ಹಣವನ್ನು ಬ್ಯಾಂಕಿಗೆ ಜಮೆ ಮಾಡದೆ ಮತ್ತು ನಗದು ಕಳವು ಮಾಡಿ ನಾಪತ್ತೆಯಾಗಿದ್ದಾನೆ. ಈ ಕುರಿತು ಕಡಬ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಾಗಿದೆ.
ನೆಟ್ಟಣ/ಕಡಬ: ನಂಬಿಕಸ್ತ ಕೆಲಸಗಾರನೇ ಬಾರ್ ಮಾಲೀಕರಿಗೆ ಲಕ್ಷಾಂತರ ರೂಪಾಯಿ ವಂಚಿಸಿ, ಹಣದೊಂದಿಗೆ ನಾಪತ್ತೆಯಾಗಿರುವ ಘಟನೆ ಕಡಬ ಪೊಲೀಸ್ ಠಾಣಾ ವ್ಯಾಪ್ತಿಯ ನೆಟ್ಟಣದಲ್ಲಿ ನಡೆದಿದೆ.
ಘಟನೆಯ ವಿವರ: ಬಿಳಿನೆಲೆ ಗ್ರಾಮದ ವಿಶಾಲ್ ಸ್ಟೀಫನ್ ಎಂಬವರ ತಾಯಿಯ ಹೆಸರಿನಲ್ಲಿ ನೆಟ್ಟಣದಲ್ಲಿ ಬಾರ್ ಅಂಡ್ ರೆಸ್ಟೋರೆಂಟ್ ನಡೆಯುತ್ತಿದೆ. ಇಲ್ಲಿ ಕಳೆದ 7 ವರ್ಷಗಳಿಂದ ಹುಂಚಪ್ಪಡಿ ನಿವಾಸಿ ಹರ್ಷಿತ್ ಬಿ.ಕೆ. ಎಂಬಾತ ಕೆಲಸಕ್ಕಿದ್ದನು. ದೀರ್ಘಕಾಲದಿಂದ ಕೆಲಸ ಮಾಡುತ್ತಿದ್ದ ಕಾರಣ, ಆತನೇ ದಿನನಿತ್ಯದ ಹಣಕಾಸಿನ ವ್ಯವಹಾರ, ಸ್ಟಾಕ್ ನಿರ್ವಹಣೆ ಹಾಗೂ ಮೇಲ್ವಿಚಾರಣೆಯ ಸಂಪೂರ್ಣ ಜವಾಬ್ದಾರಿಯನ್ನು ಹೊತ್ತುಕೊಂಡಿದ್ದನು.
ವಂಚನೆ ಬೆಳಕಿಗೆ ಬಂದದ್ದು ಹೇಗೆ?: ಡಿಸೆಂಬರ್ 21ರಂದು ಬಾರಿನ ವಹಿವಾಟಿನ ಬಗ್ಗೆ ಮಾಲೀಕರು ಪರಿಶೀಲನೆ ನಡೆಸಿದಾಗ ಲೆಕ್ಕಾಚಾರದಲ್ಲಿ ಭಾರಿ ವ್ಯತ್ಯಯ ಕಂಡುಬಂದಿದೆ. ಈ ಬಗ್ಗೆ ಹರ್ಷಿತ್‌ನನ್ನು ವಿಚಾರಿಸಿದಾಗ, “ನಾಳೆ ಎಲ್ಲವೂ ಸರಿಯಾಗಲಿದೆ, ವ್ಯಾಪಾರದ ನಗದನ್ನು ಮರುದಿನವೇ ಬ್ಯಾಂಕಿಗೆ ಜಮೆ ಮಾಡುತ್ತೇನೆ” ಎಂದು ನಂಬಿಸಿ ಸಬೂಬು ಹೇಳಿದ್ದನು.
ಆದರೆ, ಮರುದಿನ ಬ್ಯಾಂಕಿಗೆ ಹಣ ಜಮೆಯಾಗದಿದ್ದಾಗ ಅನುಮಾನಗೊಂಡ ಮಾಲೀಕರು ಆತ ತಂಗಿದ್ದ ಕೊಠಡಿಗೆ ಹೋಗಿ ನೋಡಿದಾಗ ಹರ್ಷಿತ್ ನಾಪತ್ತೆಯಾಗಿದ್ದನು. ಕೂಡಲೇ ಬಾರಿನ ಸ್ಟಾಕ್ ರೂಮ್ ಪರಿಶೀಲಿಸಿದಾಗ, ಸುಮಾರು 6,57,104 ರೂಪಾಯಿ ಮೌಲ್ಯದ ಮದ್ಯವನ್ನು ಈ ಮೊದಲೇ ಮಾರಾಟ ಮಾಡಿ, ಆ ಮೊತ್ತವನ್ನು ಬ್ಯಾಂಕಿಗೆ ಜಮೆ ಮಾಡದೆ ವಂಚಿಸಿರುವುದು ಮತ್ತು ಕಲೆಕ್ಷನ್ ಹಣದೊಂದಿಗೆ ಪರಾರಿಯಾಗಿರುವುದು ಬೆಳಕಿಗೆ ಬಂದಿದೆ.
ಪೊಲೀಸ್ ದೂರು: ಈ ಸಂಬಂಧ ವಿಶಾಲ್ ಸ್ಟೀಫನ್ ಅವರು ನೀಡಿದ ದೂರಿನ ಮೇರೆಗೆ ಕಡಬ ಪೊಲೀಸ್ ಠಾಣೆಯಲ್ಲಿ ಅ.ಕ್ರ: 94/2025 ರಂತೆ ಭಾರತೀಯ ನ್ಯಾಯ ಸಂಹಿತೆ (BNS-2023) ಸೆಕ್ಷನ್ 303(2), 314, 316(4) ಅಡಿಯಲ್ಲಿ ಪ್ರಕರಣ ದಾಖಲಾಗಿದೆ. ಪೊಲೀಸರು ಆರೋಪಿಗಾಗಿ ಹುಡುಕಾಟ ನಡೆಸುತ್ತಿದ್ದು, ತನಿಖೆ ಮುಂದುವರಿಸಿದ್ದಾರೆ.
