ಅಲಂಕಾರು ಗ್ರಾಮದಲ್ಲಿ ಆಸ್ತಿ ವಿಚಾರವಾಗಿ ಎರಡು ಗುಂಪುಗಳ ನಡುವೆ ಸಂಘರ್ಷ ನಡೆದಿದೆ. ರಾಜೇಶ್-ರೇಖಾ ದಂಪತಿ ಹಾಗೂ ಮಹಾರುದ್ರಪ್ಪ ತಂಡದ ನಡುವೆ ದೂರು-ಪ್ರತಿ ದೂರು ದಾಖಲಾಗಿದ್ದು, ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.
ಕಡಬ: ಜಮೀನು ಸಮತಟ್ಟು ಮಾಡುವ ವಿಚಾರಕ್ಕೆ ಸಂಬಂಧಿಸಿದಂತೆ ಎರಡು ಗುಂಪುಗಳ ನಡುವೆ ಗಲಾಟೆ ನಡೆದು, ಕಡಬ ಪೊಲೀಸ್ ಠಾಣೆಯಲ್ಲಿ ದೂರು ಮತ್ತು ಪ್ರತಿ ದೂರು ದಾಖಲಾಗಿರುವ ಘಟನೆ ಅಲಂಕಾರು ಗ್ರಾಮದ ಶರವೂರು ಹಾಗೂ ನಗ್ರಿಯಲ್ಲಿ ನಡೆದಿದೆ.
ಮೊದಲ ಪ್ರಕರಣ: ರಾಜೇಶ್ ಮತ್ತು ರೇಖಾ ದೂರು
ಪಿರ್ಯಾದಿದಾರರಾದ ರೇಖಾ ಅವರು ನೀಡಿರುವ ದೂರಿನಂತೆ, ಅವರ ಪತಿ ರಾಜೇಶ್ ಅವರು ಎರಡು ವರ್ಷಗಳ ಹಿಂದೆ ಮಲ್ಲಿಕಾರ್ಜುನ ಎಂಬುವವರಿಂದ ಸರ್ವೇ ನಂಬರ್ 43/14ರಲ್ಲಿ 70 ಸೆಂಟ್ಸ್ ಜಾಗವನ್ನು ಖರೀದಿಸಿದ್ದರು. ಏಪ್ರಿಲ್ 5ರಂದು ಮಧ್ಯಾಹ್ನ 2 ಗಂಟೆಯ ಸುಮಾರಿಗೆ ರಾಜೇಶ್ ಅವರು ಜೆಸಿಬಿ ಮೂಲಕ ಮನೆ ನಿರ್ಮಿಸಲು ಜಾಗವನ್ನು ಸಮತಟ್ಟು ಮಾಡುತ್ತಿದ್ದಾಗ, ಪಕ್ಕದ ನಿವಾಸಿಗಳಾದ ಮಹಾರುದ್ರಪ್ಪ (ಯಾನೆ ಶಿವರುದ್ರಪ್ಪ) ಮತ್ತು ಆತನ ಅಕ್ಕ ಪುಷ್ಪಾವತಿ ಎಂಬುವರು ಅಕ್ರಮ ಪ್ರವೇಶ ಮಾಡಿದ್ದಾರೆ. ಈ ವೇಳೆ ದಂಪತಿಗಳನ್ನು ಅವಾಚ್ಯ ಶಬ್ದಗಳಿಂದ ನಿಂದಿಸಿ, ಕೈಯಿಂದ ಹಲ್ಲೆ ನಡೆಸಿ ಜೀವ ಬೆದರಿಕೆ ಹಾಕಿದ್ದಾರೆ ಎಂದು ಆರೋಪಿಸಲಾಗಿದೆ. ಈ ಸಂಬಂಧ ಕಡಬ ಪೊಲೀಸ್ ಠಾಣೆಯಲ್ಲಿ ಅಪರಾಧ ಸಂಖ್ಯೆ 40/2026 ರಂತೆ ಪ್ರಕರಣ ದಾಖಲಾಗಿದೆ.
ಎರಡನೇ ಪ್ರಕರಣ: ಮಹಾರುದ್ರಪ್ಪ ನೀಡಿದ ಪ್ರತಿ ದೂರು
ಇದೇ ಘಟನೆಗೆ ಸಂಬಂಧಿಸಿದಂತೆ ಹಾಸನ ಜಿಲ್ಲೆಯ ಆಲೂರು ತಾಲೂಕಿನ ಬೈರಾಪುರ ನಿವಾಸಿ ಮಹಾರುದ್ರಪ್ಪ ಅವರು ಪ್ರತಿ ದೂರು ನೀಡಿದ್ದಾರೆ. ಅವರ ದೂರಿನ ಪ್ರಕಾರ, ಅಲಂಕಾರು ಗ್ರಾಮದ ನಗ್ರಿಯ ಸರ್ವೆ ನಂಬರ್ 44/3ರಲ್ಲಿ ಅವರ ತಾಯಿಯ ಹೆಸರಿನಲ್ಲಿ ಒಂದು ಎಕರೆ ಜಂಟಿ ಜಮೀನು ಇದೆ. ಏಪ್ರಿಲ್ 5ರಂದು ಅವರು ಮತ್ತು ಅವರ ಅಕ್ಕ ಪುಷ್ಪಲತಾ ಜಮೀನು ವೀಕ್ಷಣೆಗೆ ಬಂದಾಗ, ರಾಜೇಶ್ ಎಂಬುವವರು ಜೆಸಿಬಿ ಮೂಲಕ ಅಕ್ರಮವಾಗಿ ಜಮೀನು ಸಮತಟ್ಟು ಮಾಡುತ್ತಿರುವುದು ಕಂಡುಬಂದಿದೆ. ಇದನ್ನು ಪ್ರಶ್ನಿಸಿದಾಗ ರಾಜೇಶ್, ಅವರ ಪತ್ನಿ ರೇಖಾ ಮತ್ತು ಇತರರು ಸೇರಿ ಅವಾಚ್ಯ ಶಬ್ದಗಳಿಂದ ನಿಂದಿಸಿ, ಹಲ್ಲೆ ನಡೆಸಿ ಜೀವ ಬೆದರಿಕೆ ಒಡ್ಡಿದ್ದಾರೆ ಎಂದು ದೂರಿನಲ್ಲಿ ತಿಳಿಸಿದ್ದಾರೆ. ಈ ಕುರಿತು ಅಪರಾಧ ಸಂಖ್ಯೆ 41/2026 ರಡಿ ಪ್ರಕರಣ ದಾಖಲಾಗಿದೆ. ಪೊಲೀಸರು ಎರಡೂ ಪ್ರಕರಣಗಳನ್ನು ದಾಖಲಿಸಿಕೊಂಡು ಮುಂದಿನ ತನಿಖೆ ಕೈಗೊಂಡಿದ್ದಾರೆ.
