ಕಡಬ: ಇಲ್ಲಿನ ಪಟ್ಟಣ ಪಂಚಾಯತ್ ವ್ಯಾಪ್ತಿಯ ಪುಳಿಕುಕ್ಕು ವಾರ್ಡಿನ ತೆಕ್ಕಡ್ಕ ಸಮೀಪ ವಾಹನಕ್ಕೆ ಸೈಡ್ ಕೊಡುವ ವೇಳೆ ಬಸ್ಸೊಂದು ತಿರುವಿನಲ್ಲಿ ಚರಂಡಿಗೆ ಇಳಿದಿದ್ದು ಪ್ರಯಾಣಿಕರು ಸಹಿತ ಚಾಲಕ ನಿರ್ವಾಹಕ ಅಪಾಯದಿಂದ ಪಾರಾಗಿದ್ದಾರೆ.
ನ.3 ರಂದು ಕಡಬದಿಂದ ಪಂಜ ಮಾರ್ಗವಾಗಿ ಸುಳ್ಯಕ್ಕೆ ಮುಂಜಾನೆ 8:45 ಕ್ಕೆ ತೆರಳುತ್ತಿದ್ದ ಬಸ್ ಇದಾಗಿದೆ. ಬಸ್ ಚರಂಡಿಗೆ ಬಿದ್ದ ಪ್ರದೇಶದಲ್ಲಿ ಈಗಾಗಲೇ ಹಲವು ಅಪಘಾತಗಳು ಸಂಭವಿಸಿದೆ. ಬೈಕ್ ,ಆಟೋ, ಜೀಪು ಸಹಿತ ಹಲವು ವಾಹನಗಳು ಚರಂಡಿಗೆ ಬಿದ್ದಿದ್ದವು.
ಎರಡು ತಿರುವುಗಳಿದ್ದು ಚರಂಡಿ ಪಕ್ಕ ಪೊದೆಗಳಿಂದ ತುಂಬಿ ಹೋಗಿದೆ . ಘನ ವಾಹನಗಳು ಸಂಚರಿಸುವ ಸಂದರ್ಭ ಈ ತಿರುವಿನಲ್ಲಿ ಜಾಗದ ಕೊರತೆ ಎದುರಾಗುತ್ತದೆ. ಇನ್ನೊಂದು ವಾಹನಕ್ಕೆ ಜಾಗ ಕೊಡುವಾಗ ಘನ ವಾಹನವಾದಲ್ಲಿ ಚರಂಡಿಗೆ ಇಳಿಸಬೇಕಾದ ಅನಿವಾರ್ಯ ಪರಿಸ್ಥಿತಿ ನಿರ್ಮಾಣವಾಗುತ್ತದೆ.
ಈ ಹಿಂದೆ ಅಪಘಾತ ನಡೆದ ಸಂದರ್ಭದಲ್ಲಿ ಅಲ್ಲಿನ ನಿವಾಸಿಗಳು ಮೋರಿ ಅಳವಡಿಸಿ ರಸ್ತೆಯನ್ನು ನೇರ ಮಾಡುವಂತೆ ಸ್ಥಳೀಯಾಡಳಿತವನ್ನು ಒತ್ತಾಯಿಸಿದ್ದರು.
